ღონისძიება კულტურის სახლში გაიმართა, რომლის ფარგლებშიც მრავალფეროვანი აქტივობები იყო წარმოდგენილი. მოეწყო გამოფენა „ წინაპართა ნაკვალევზე“, სოფლის მდიდარი წარსულის, მისი შემოქმედებითი თუ სპორტული ცხოვრების შესახებ. გაიხსენეს ცნობილი აწყურელი მოღვაწეები, ადამიანები, რომლებმაც სხვადასხვა დროს წვლილი შეიტანეს მშობლიური სოფლის განვითარებაში. სტუმრების წინაშე მუსიკალური და ქორეოგრაფიული ნომრებით წარსდგნენ ადგილობრივი შემსრულებლები. განსაკუთრებით ემოციური იყო უფროსი თაობის მოცეკვავეების მიერ შესრულებული ნომერი.

აწყურლებს დღესასწაული ახალციხის მუნიციპალიტეტის მერმა ვარლამ წიკლაურმა, სამცხე-ჯავახეთის სახელმწიფო რწმუნებულმა ზაალ გელაშვილმა და საკრებულოს თავმჯდომარემ საბა კბილაშვილმა მოადგილეებთან ერთად მიულოცეს და აქ მცხოვრებ თითოეულ ოჯახს წარმატებები უსურვეს. აღინიშნა, რომ მდიდარი ისტორიული და კულტურული ტრადიციების მქონე სოფელი, მალე ახალ სიცოცხლეს შეიძენს, ორი უმნიშვნელოვანესი კულტურული მემკვიდრეობის ძეგლის – აწყურის ციხისა და აწყურის საკათედრო ტაძრის რეაბილიტაციის დასრულების შემდეგ.

ღონისძიებას სახელმწიფო რწმუნებულის ადმინისტრაციის და ადგილობრივი თვითმმართველობის წარმომადგენლები, მოწვეული სტუმრები და სოფლის მცხოვრებლები ესწრებოდნენ.