ცხელი ხაზი:0 (365) 22 36 16 ან 0 (365) 22 08 08

გამწვანების აქცია ახალციხეში

5 აპრილი, 2019

ახალციხის მუნიციპალიტეტის მერიის ორგანიზებით ქალაქ ახალციხეში გამწვანების  მასშტაბური აქცია გაიმართა. ღონისძიების  ფარგლებში ქალაქის ცენტრალურ ქუჩებსა და მის შემოგარენში 500-მდე ძირი სხვადასხვა  წიწვოვანი და ფოთლოვანი ჯიშის ხე-მცენარე დაირგო.

ნეკერჩხალის, კედრის, ცაცხვის და იფნის ნერგები  სამხარეო ადმინისტრაციის, შოთა რუსთაველისა და თამარ მეფის ძეგლების, თამარაშვილის ქუჩაზე საპატრულო პოლიციის, კოსტავას ქუჩაზე და ახალციხის ტბის მიმდერბარე ტერიტორიებზე გადანაწილდა. გამწვანების სამუშაოები ჩატარდა ახალციხის მუნიციპალიტეტის საბავშვო ბაგა-ბაღების ეზოებშიც, სადაც  140 ძირი ფიჭვის ნერგი დარგეს.

გამწვანების აქციაში უშუალო მონაწილეობა მიიღეს  სამცხე-ჯავახეთის სახელმწიფო რწმუნებულმა ბესიკ ამირანაშვილმა, ახალციხის მუნიციპალიტეტის მერმა ზაზა მელიქიძემ, საკრებულოს თავმჯდომარემ გელა ნოზაძემ. აქციას შეუერთდნენ  პოლიციის სამხარეო და რაიონული დეპარტამენტების ხელმძღვანელები, საპატრულო პოლიციის თანამშრომლები, მუნიციპალიტეტის საკრებულოს დეპუტატები, სამხარეო ადმინისტრაციის, მერიისა და საკრებულოს საჯარო მოხელეები.  

მუნიციპალიტეტის მერის განცხადებით - „აქციის ფარგლებში,  ქალაქის მასშტაბით შერჩეულ სხვადასხვა ლოკაციებზე რამდენიმე სახეობის ხე მცენარე დაირგო.  მიმდინარე ინფრასტრუქტურული სამუშაოების პარალელურად, ჩვენთვის მნიშვნელოვანია  მისი  უბნების გამწვანებაც, დარწმუნებული ვართ  ახალი ნარგავები ქალაქს სულ სხვა ელფერს შესძენს და როგორც ადგილობრივებისთვის, ისე ტურისტებისა და ვიზიტორებისთვის კიდევ უფრი მიმზიდველი გახდება, ამასთან ეს არ იქნება ერთჯერადი აქცია და  მსგავსი ღონისძიებები მომავალშიც დაიგეგმება“.

აქცია დაიგეგმა პროექტის „დაგეგმე მუნიციპალიტეტის ბიუჯეტი“ ფარგლებში, სადაც  ახალციხელი თამარ კაპანაძის ინიციატივამ ქალაქის გამწვანების თაობაზე, მოსახლეობის ყველაზე დიდი მხარდაჭერა მოიპოვა. გამწვანების  აქცია  სამუშაო იარაღებითა და შესაბამისი ინვენტარით  ახალციხის პროფესიულმა კოლეჯმა „ოპიზარმა“ უზრუნველყო. ახალი ნარგავების მოვლაზე ახალციხის მუნიციპალიტეტის შპს „კეთილმოწყობის“ სამსახურის თანამშრომლები იზრუნებენ.

გააზიარე